Gwamnonin da aka zaɓa a ƙarƙashin jam’iyyar All Progressives Congress (APC) sun yi nazari kan sakamakon zaɓen fidda gwani na jam’iyyar, tare da yanke shawarar ganawa da Shugaban jam’iyyar na ƙasa, Farfesa Netanwe Yilwatda, da sauran shugabannin APC.
Shugaban Progressives Governors’ Forum (PGF) kuma Gwamnan Jihar Imo, Hope Uzodimma, ne ya bayyana hakan bayan taron dandalin gwamnonin APC da ya ƙare a safiyar ranar Talata a Abuja.
Kamfanin Dillancin Labarai na Najeriya (NAN) ya ruwaito cewa PGF ƙungiya ce da ta haɗa dukkan gwamnonin APC masu ci a faɗin ƙasar nan.
Da yake zantawa da manema labarai bayan kammala taron, Uzodimma ya ce gwamnonin sun kuma kuduri aniyar yin aiki domin tabbatar da cewa rayuwar ‘yan Najeriya ta inganta.
Ya ce taron ya yi nazari kan sakamakon zaɓen fidda gwani na jam’iyyar da aka gudanar a sassa daban-daban na ƙasar, da kuma zaɓen gwamnan Jihar Ekiti da aka gudanar kwanan nan, tare da wasu zaɓukan cike gurbi, inda APC ta samu nasara mai yawa.
Ya ce: “Mun yanke shawarar yin aiki domin magance matsaloli da ƙalubalen da ke fuskantar tsarin dimokuraɗiyyarmu, tare da tabbatar da cewa al’ummarmu ta fi samun walwala.
“Haka kuma mun amince za mu gana da shugabannin jam’iyyar domin tsara dabarun tunkarar zaɓen shugaban ƙasa da na ‘yan Majalisar Dokoki ta Ƙasa na shekarar 2027. Mun shirya tsaf domin wannan aiki.”
Shugaban PGF ya ƙara da cewa dandalin gwamnonin ya kuma amince da ci gaba da haɗa kai da shugabancin APC domin ƙarfafa jam’iyyar da kuma shirya ta yadda ya kamata domin zaɓuɓɓukan da ke tafe.
Gwamnonin jihohin Ekiti, Zamfara, Taraba, Legas, Sokoto, Kano, Kaduna, Gombe, Kebbi, Akwa Ibom da Borno, da sauransu, sun halarci taron.
(NAN)