Daga JOHNSON NONGU, Makurdi
Tsohon Shugaban Mulkin Soja na Jihar Benue, Air Commodore (Mai Ritaya) Jonah Jang, ya bayyana cikakken goyon bayansa ga kafa rundunar ‘yan sandan jihohi, yana mai cewa hakan shi ne muhimmin mafita ga matsalar tsaron da ke ci gaba da ƙamari a Najeriya.
Ya kuma yaba da irin ci gaban da Jihar Benue ta samu cikin shekaru 50 da suka gabata.
Jang ya bayyana hakan ne a wata tattaunawa ta musamman da wakilinmu a ranar Asabar yayin bikin cika shekaru 50 da kafuwar Jihar Benue da aka gudanar a dandalin IBB Square da ke Makurdi.
Ya ce rashin tsaro shi ne babban abin da ke hana ci gaba, sannan ya bukaci gwamnatocin tarayya, jihohi da na kananan hukumomi su ɗauki matakan gaggawa.
Tsohon gwamnan ya yi maraba da amincewar Gwamnatin Tarayya na kafa rundunar ‘yan sandan jihohi.
Ya ce ya shafe shekaru da dama yana fafutukar ganin an aiwatar da wannan tsari duk da suka da suka fuskanta.
Ya ce, “Ina daga cikin mutanen farko da suka nemi a kafa ‘yan sandan jihohi. Lokacin da nake gwamna, an yi mini kiraye-kirayen suna iri-iri saboda wannan ra’ayi. Yau ina farin ciki cewa gwamnatin Tinubu ta amince da kafa rundunar ‘yan sandan jihohi.”
Jang, wanda ya kafa rundunar Operation Rainbow a lokacin da yake gwamnan Jihar Plateau, ya ce daukar ma’aikatan tsaro ‘yan asalin jihohinsu da suka san al’ummominsu zai ƙarfafa tattara bayanan sirri tare da inganta yaki da rashin tsaro.
Ya bayyana kwarin gwiwar cewa Jihar Plateau ba za ta fuskanci wata babbar matsala ba wajen kafa rundunar ‘yan sandanta saboda an riga an shimfiɗa tubalin hakan ta hanyar kafa Operation Rainbow.
Ya ce, “Game da Jihar Plateau kuwa, an riga an kafa tubalin hakan ta hanyar Operation Rainbow. Saboda haka na yi imanin cewa Gwamna Caleb Mutfwang ba zai sha wahala wajen kafa rundunar ‘yan sandan jihar ba.”
Tsohon shugaban mulkin sojan ya kuma bukaci gwamnonin yankin Middle Belt su yi aiki kafada da kafada da Gwamnatin Tarayya ƙarƙashin jagorancin Shugaba Bola Tinubu domin kawo ƙarshen rashin tsaro.
Ya yi gargadin cewa ba za a samu ci gaba mai ɗorewa ba matuƙar ba a samar da zaman lafiya ba.
Ya ce, “Ba za mu iya samun ci gaba na hakika a irin wannan yanayi ba. Da zarar mun magance matsalar rashin tsaro, hakan zai fi alheri kafin ta ci gaba da rusa ginshiƙan al’ummarmu.”
Da yake waiwayar bikin cika shekaru 50 da kafuwar Jihar Benue, Jang ya yaba da irin sauye-sauyen da jihar ta samu tun bayan kafuwarta.
Ya tuna cewa Benue na daga cikin jihohin da suka fi koma baya lokacin da ya karɓi mulki a matsayin shugaban mulkin soja.
Ya ce, “Lokacin da na zo Benue a matsayin shugaban mulkin soja, jihar na daga cikin mafi ƙarancin ci gaba a ƙasar nan. Ina farin ciki cewa tubalan da muka shimfiɗa sun ci gaba da haifar da ci gaba.”
Ya kuma tuna cewa lokacin da ya karɓi mulki, Makurdi na da ƴan tituna kaɗan da aka yi wa kwalta tare da gidajen ciyawa a wurare daban-daban.
Ya ce gwamnatinsa ta aiwatar da wani gagarumin shirin gyaran birane wanda ya sauya fasalin Makurdi zuwa birnin da ya dace da matsayin babban birnin jiha.
Jang ya yabawa Gwamna Hyacinth Alia saboda ci gaba da aiwatar da ayyukan more rayuwa a faɗin jihar.
Ya ce ya gamsu da ayyukan gina tituna da sauran manyan ayyukan da ke gudana.
Ya ce, “Ina taya gwamnan na yanzu murna saboda na ga ayyuka masu yawa da ake gudanarwa. Abin ƙarfafa gwiwa ne ganin cewa Benue na ci gaba da samun bunƙasa a hankali.”
Duk da irin nasarorin da aka samu, tsohon gwamnan ya bukaci gwamnatin jihar ta ƙara mayar da hankali wajen kai ayyukan ci gaba zuwa yankunan karkara.
Ya jaddada cewa talauci na ci gaba da addabar al’ummomin karkara, lamarin da ke buƙatar kulawa cikin gaggawa.