Daga HASSAN SHALLPELLA, Yola
Rundunar ’Yan Sandan Jihar Adamawa ta kama wani matashi mai shekaru 27, Ali Haruna, bisa zargin cewa ya yanke kan wata mata mai suna Aisha a wani otal da ke garin Girei, sannan ya sha jininta.
Haruna, wanda ke zaune a unguwar Digno da ke Karamar Hukumar Fufore, ya fito ne daga Unguwar Bolori da ke Maiduguri a Jihar Borno.
An ce wanda ake zargin ya sauka a otal din No Vex da ke Girei tare da matar a ranar Juma’a, kafin daga bisani lamarin ya faru.
A cewar wanda ake zargin, yayin da suke otal din, shi da matar sun sha wiwi sannan suka yi jima’i, kafin daga bisani ya yanke kanta tare da shan jininta.
Ya ce wannan ne karo na farko da ya hadu da matar.
Jami’in Hulda da Jama’a na Rundunar ’Yan Sandan Jihar Adamawa, SP Suleiman Nguroje, ya bayyana hakan a cikin wata sanarwa, inda ya ce binciken farko ya nuna cewa wanda ake zargin ya yi ikirarin cewa shi ne ya aikata laifin.
Nguroje ya ce ana ci gaba da gudanar da bincike domin gano yadda lamarin ya faru da kuma dalilin da ya sa aka aikata shi.
Ya kara da cewa an kwato wata wuka da ake zargin an yi amfani da ita wajen aikata laifin daga hannun wanda ake zargin.
A cewarsa, Kwamishinan ’Yan Sandan Jihar, CP Kabir Hassan, ya umarci Sashen Binciken Manyan Laifuka na Jihar (SCID) da ya karbi binciken lamarin tare da gudanar da shi cikin sirri, kwarewa da zurfi.
Rundunar ta tabbatar wa jama’a cewa duk wanda aka samu da hannu a laifin zai fuskanci hukunci mai tsauri bisa tanadin doka.
Ta kuma bukaci jama’a da su kwantar da hankalinsu, su guji yada bayanan da ba a tabbatar da sahihancinsu ba, sannan su guji daukar doka a hannunsu, yayin da ake jiran kammala binciken ’yan sanda.