Daga MARIE-THERESE NANLONG
Magajin Garin Landan, Sadiq Khan, ya karbi bakuncin taron farko na kasuwanci tsakanin Landan da Afirka, inda ya hada sama da shugabannin kamfanoni 200, masu zuba jari da masu tsara manufofi daga Afirka da Birtaniya domin kara karfafa huldar kasuwanci da zuba jari tsakanin bangarorin biyu.
Bayanan taron na kunshe ne cikin wata sanarwa da Ndidiamaka Eze, Babbar Jami’ar Hulda da Manema Labarai da Harkokin Jama’a kuma Jagorar Sadarwa kan Ci Gaba, Kasuwanci da Zuba Jari ta Cibiyar Najeriya ta Ofishin Harkokin Waje, Commonwealth da Raya Kasashe na Birtaniya (FCDO), ta fitar a ranar Alhamis, wadda jaridar The Nigeria Standard ta samu ta hanyar imel.
An gudanar da taron ne a Landan a matsayin wani bangare na kokarin mayar da birnin a matsayin babbar kofar shiga duniya ga kamfanonin Afirka da ke neman fadada harkokinsu zuwa kasashen waje tare da samun damar zuba jari.
Eze ta bayyana cewa taron ya biyo bayan ziyarar kasuwanci da Sadiq Khan ya kai Najeriya, Ghana da Afirka ta Kudu a shekarar 2025, wanda shi ne karo na farko da Magajin Garin Landan ya jagoranci irin wannan ziyara.
Tun bayan wannan ziyara, an ruwaito cewa kamfanonin Afirka sun zuba fiye da fam miliyan 30 a Landan ta hanyar zuba jarin kai tsaye daga kasashen waje.
Da yake jawabi a wajen taron, Khan ya ce Landan na ci gaba da kasancewa wurin da kamfanonin Afirka suka fi so idan suna neman shiga kasuwannin duniya.
A cewarsa, “Ina alfahari da karbar bakuncin taron farko na kasuwanci tsakanin Landan da Afirka a Majalisar Birnin Landan, wanda ya hada masu zuba jari, ‘yan kasuwa da kamfanoni domin nuna cewa Landan ita ce mafi kyawun birni a duniya ga kamfanonin Afirka da ke son fadada harkokinsu zuwa kasashen duniya tare da jawo karin zuba jari.”
Ya kara da cewa ziyarar kasuwancin da ya kai kasashen Afirka ta taimaka wajen kara zuba jari daga waje da fadada harkokin kasuwanci, lamarin da ya samar da ayyukan yi tare da karfafa dangantakar tattalin arziki tsakanin Landan da kasashen Afirka.
Taron ya hada wakilai daga Nigerian Exchange Group, Ventures 54, London Africa Network, Jami’ar SOAS ta Landan da kuma Ma’aikatar Kasuwanci, Harkokin Noma da Masana’antu ta Ghana.
Jami’an da suka halarci taron sun jaddada muhimmancin Landan a matsayin cibiyar kasuwancin Afirka, inda suka bayyana cewa kungiyoyi da kamfanonin Afirka 117 ne a halin yanzu ke da rijista a Kasuwar Hannayen Jarin Landan, adadi mafi yawa fiye da kowace kasuwar hannayen jari a duniya.
Kamfanonin suna gudanar da harkokinsu a fannoni daban-daban da suka hada da sadarwa, harkokin kudi, makamashi da fasaha.
Taron ya kuma nuna yadda dangantakar tattalin arziki tsakanin Birtaniya da Afirka ke kara habaka.
Darajar kasuwanci tsakanin Birtaniya da Afirka ta kai kusan fam biliyan 52 a shekarar 2025, yayin da kayayyakin da Birtaniya ke fitarwa zuwa kasuwannin Afirka suka karu zuwa kusan fam biliyan 26.2.
Sanarwar ta kara da cewa Daraktan Kasar Najeriya da Yankin Anglo West Africa na Ma’aikatar Kasuwanci da Ciniki ta Birtaniya, Mark Smithson, ya bayyana taron a matsayin wata dama ta fadada hadin gwiwar tattalin arziki tsakanin yankunan biyu.
Smithson ya ce, “Taron Kasuwanci na Landan da Afirka ya hada buri, jari da kirkire-kirkire, tare da kara tabbatar da matsayin Landan a matsayin babbar kofar shiga duniya ga kamfanonin Afirka.”
Ya ce hadin gwiwar da ake ginawa ta hanyar taron za ta taimaka wajen bunkasa ci gaba mai dorewa, samar da ayyukan yi da kuma wadatar tattalin arziki na dogon lokaci a Afirka da Birtaniya.
Taron ya kuma nuna sabbin jarin da kamfanonin Afirka suka zuba ko suke shirin zubawa a Landan.
Kamfanin zuba jari na Afirka ta Kudu mai suna Teybridge Capital ya bayyana cewa fadada harkokinsa zuwa Landan zai kara kusan fam miliyan 8 ga tattalin arzikin birnin tare da samar da ayyukan yi sama da 30.
Babban Jami’in Gudanarwa na Teybridge Capital, Dylan Martin, ya ce wannan mataki na nuna irin ci gaban da kamfanin ke samu a kasuwar Birtaniya.
Ya ce, “Fadada ayyukanmu zuwa Landan wata muhimmiyar nasara ce ga Teybridge Capital Europe kuma tana nuna irin karfin ci gabanmu a kasuwar Birtaniya.”
A wani bangaren kuma, kamfanin Dangote Cement ya sanar da shirinsa na yin rajista ta biyu a Kasuwar Hannayen Jarin Landan yayin da zai ci gaba da rike rajistarsa ta farko a Kasuwar Hannayen Jarin Najeriya, inda ake sa ran za a kammala wannan shiri nan da watan Satumban shekarar 2026.
Har ila yau, taron ya tattauna hanyoyin kara hadin gwiwa a fannoni da suka hada da harkokin kudi, fasahar zamani, lafiya, ilimi, ababen more rayuwa, sauyin makamashi da kuma masana’antun kirkire-kirkire.
Jami’an Landan sun ce birnin na ci gaba da kasancewa wurin da ya fi jawo zuba jarin kai tsaye daga Afirka a nahiyoyin Turai da Amurka.