Daga LOIS DADUUT
Shugaban Karamar Hukumar Jos North, Barista John Christopher, ya samu lambar yabo ta Integrity Icon of Nigeria (IION) Award for Leadership saboda gudunmawarsa wajen tabbatar da mulki na gaskiya, nuna gaskiya da kuma kyakkyawan shugabanci a harkokin gwamnati.
An mika lambar yabon ne a dakin taro na sakatariyar karamar hukumar, ta hannun Daraktan Zartarwa na Cibiyar Da’a da Tantance Kai, Prince Sale Yakubu, a wani taro da jami’an gwamnati da masu ruwa da tsaki suka halarta.
Da yake jawabi, Prince Yakubu ya ce an kebe wannan lambar yabo ne ga shugabannin gwamnati da suka nuna halaye na gaskiya da shugabanci irin na wadanda suka kafa Najeriya.
Ya ce cibiyar ta gudanar da bincike na sirri kan ayyukan Karamar Hukumar Jos North kafin ta yanke shawarar karramawa.
“Wannan kungiya na bayar da lambobin yabo ga shugabanni da suka nuna halaye da shugabanci irin wanda aka tanada daga gwarazanmu na baya,” in ji shi.
Ya kara da cewa: “Mun gudanar da bincike na sirri kan ayyukan shugaban Jos North da tawagarsa. Bayan tantancewa da tabbatarwa, sun zarce ma’aunin da aka gindaya, don haka suka cancanci wannan yabo.”
Ya yabawa hukumar kan abin da ya kira kyakkyawan aiki a ofis, gaskiya, bin doka da kuma amsa bukatun jama’a cikin gaggawa.
Da yake karbar lambar yabon, Barista John Christopher ya nuna godiya, inda ya sadaukar da lambar ga al’ummar Jos North.
“Mu na rike da amanar jama’a, don haka ba mu da wani zabi illa ci gaba da yin iya kokarinmu wajen hidimtawa al’umma,” in ji shi.
Ya kara da cewa wannan karramawa zai kara masa kwarin gwiwa wajen inganta ayyuka da tabbatar da gaskiya a mulkinsa.
Cibiyar ta kuma karrama wasu manyan jami’an karamar hukumar, ciki har da mataimakin shugaban karamar hukumar, Sani Garkuwa; shugaban majalisa, Job Ayuba; sakataren karamar hukumar, Gyang Samuel; Daraktan Ma’aikata, Alhaji Suleiman Maikano; da Shugaban Ma’aikatan Fadar Shugaban Karamar Hukuma, Sunday Bunu.
Sauran da aka karrama sun hada da Daraktan Kudi, jami’in yada labarai da sauran manyan ma’aikata.
A rahoton tantancewar cibiyar, an bayyana cewa Karamar Hukumar Jos North ta samu sama da kashi 70 cikin 100 a gwajin gaskiya da nagarta.
Wannan sakamako ya sanya ta a matsayi na biyu a cikin kananan hukumomin Jihar Plateau, tare da kasancewa cikin manyan kananan hukumomi 100 a Najeriya da suka cika ka’idojin nagarta da kyakkyawan shugabanci.
Wakilinmu ya ruwaito cewa wannan lambar yabo na daga cikin shirye-shiryen Cibiyar Da’a da Tantance Kai, wadda ke inganta gaskiya da nagarta a gwamnati a dukkan matakai.