Daga VICTOR GAI, Jalingo
Sama da mutane 4,000 ne daga kananan hukumomi 16 na Jihar Taraba suka nemi aikin ma’aikatan lafiya 550 da gwamnatin jihar ta amince a dauka aiki a karkashin tsarin kula da lafiya na mataki na biyu.
Kwamishiniyar Yada Labarai da Wayar da Kai ta jihar, Barista Zainab Jalingo, ce ta bayyana hakan a cikin wata sanarwa.
Ta ce wadanda za a dauka aikin sun hada da ma’aikatan jinya da jami’an kula da bayanan marasa lafiya, wadanda za a zabo daga cikin sama da masu neman aikin 4,000.
Sanarwar ta ce, “An amince da daukar ma’aikatan jinya 400 da jami’an kula da bayanan marasa lafiya 150 a matsayin wani bangare na kokarin kara inganta ayyukan kiwon lafiya a fadin jihar bayan sake fasalin cibiyoyin lafiya na mataki na biyu da kuma samar da na’urorin kiwon lafiya na zamani da gwamnatin Gwamna Agbu Kefas ta yi.”
A cewar kwamishiniyar, ana gudanar da aikin daukar ma’aikatan ne ta hannun Hukumar Kula da Ma’aikatan Lafiya ta Jihar Taraba.
Ta bayyana cewa an gudanar da aikin ne bayan tallar neman aiki da aka yi ga jama’a, wanda ya jawo sama da aikace-aikace 4,000 daga kwararrun masu neman aiki a kananan hukumomi 16 na jihar.
“Ana gudanar da tantancewa da hirarrakin ne bisa ka’idojin gaskiya, cancanta, adalci da bai wa kowa dama iri daya, domin tabbatar da cewa wadanda suka cancanta ne kawai za a dauka domin karfafa ayyukan kiwon lafiya a jihar,” in ji sanarwar.
Sanarwar ta kara da cewa za a tura wadanda suka yi nasara zuwa kananan hukumomi 16 na jihar domin magance karancin ma’aikata a cibiyoyin lafiya.
“Za a tura wadanda suka yi nasara zuwa cibiyoyin lafiya na mataki na biyu a fadin jihar bisa bukatar ma’aikata da aka gano.
“Wannan tsarin zai taimaka wajen cike gibin ma’aikata, inganta ingancin ayyukan lafiya da kuma kara saukaka samun ingantaccen kulawar lafiya, musamman a yankunan da ba su da wadataccen sabis.
“Wannan shiri wani bangare ne na kudirin gwamnatin jihar na sake farfado da bangaren lafiya ta hanyar bunkasa albarkatun dan Adam, inganta gine-ginen cibiyoyin lafiya da kuma ci gaba da zuba jari wajen samar da kayan aikin lafiya na zamani,” in ji sanarwar