Daga JOHN WADA, Lafia
Gwamnatin Jihar Nasarawa ta amince da daukar sabbin malaman makarantar firamare 1,000 aiki domin magance karancin malamai a yankunan karkara na jihar.
Mataimaki na Musamman ga Gwamna kan Harkokin Jama’a, Hon. Peter Ahemba, ne ya bayyana hakan a ranar Litinin yayin taron manema labarai na wata-wata da aka gudanar a sakatariyar Kungiyar ‘Yan Jarida ta Najeriya (NUJ), reshen Jihar Nasarawa da ke Lafia.
Ahemba, wanda ya wakilci Gwamna Abdullahi Sule, ya ce kimanin mutum 10,000 ne suka nemi guraben aikin, amma mutum 1,000 kacal za a dauka.
Ya ce daukar ma’aikatan na cikin wani tsari na musamman da Hukumar Ilimin Bai Daya ta Jihar Nasarawa (NSUBEB) ta aiwatar domin cike gibin malamai a makarantun karkara.
A cewarsa, duk wadanda suka samu nasarar aikin za a tura su kai tsaye zuwa makarantun da ke kauyuka.
Ya kara da cewa gwamnati ta dauki wani kamfani mai zaman kansa domin gudanar da aikin tantancewa da daukar ma’aikatan, domin tabbatar da gaskiya da adalci.
Ahemba ya ce duk da yawan masu neman aikin, kadan ne suka samu nasarar cin jarabawar tantancewa.
Sai dai ya ce har yanzu ba a fitar da cikakken sakamakon jarabawar ba.
Ya bukaci masu neman aikin su ci gaba da hakuri tare da jiran sanarwar Hukumar NSUBEB da kamfanin da ke kula da aikin kan mataki na gaba na daukar malaman.