Tawagar ƙwallon ƙafar Masar ta yi bankwana da Gasar Kofin Duniya ta 2026 a ranar Talata bayan Argentina ta lallasa ta da ci 3-2 a wasan zagaye na 16 mafi ƙarfi, wanda ya kawo ƙarshen tafiyar tarihi da ta yi a gasar.
Masar ce ta fara cin ƙwallo a minti na 15 ta hannun Yasser Ibrahim, wanda ya zura ta da kai.
Daga baya Mostafa Ziko ya ƙara ta biyu a minti na 67 bayan ya karɓi wata ƙwallo daga gefe ya jefa ta raga.
Argentina ta samu damar rama a minti na 21 bayan Nicolas Tagliafico ya samu bugun fenariti.
Sai dai mai tsaron ragar Masar, Mostafa Ahmed Shobeir, ya hana fitaccen ɗan wasan Argentina, Lionel Messi, cin ƙwallon bayan ya tare bugun fenaritin.
Argentina ta rage tazarar da ƙwallon Cristian Romero a minti na 79.
Kasa da minti biyar bayan haka, Messi ya farke wasa da ƙwallon da ya zura a minti na 83.
A minti na uku na ƙarin lokaci, Enzo Fernandez ya zura ƙwallo da kai, wadda ta bai wa Argentina nasarar 3-2.
Argentina ta shiga wannan wasa ne bayan ta yi nasara a dukkan wasanni huɗun da ta buga a gasar.
Tawagar na ƙarƙashin jagorancin tauraron duniya Lionel Messi mai shekara 39, wanda ake ganin wannan na iya zama Gasar Kofin Duniya ta ƙarshe da zai buga.
Argentina za ta kara da wadda ta yi nasara tsakanin Switzerland da Colombia a wasan daf da na kusa da na ƙarshe ranar 11 ga watan Yuli.
Duk da ficewar da ta yi, Masar ta kafa sabon tarihi bayan ta kai matakin da ba ta taɓa kaiwa ba a Gasar Kofin Duniya.
A karon farko a tarihinta, Masar ta tsallake matakin rukuni zuwa wasannin fitar da gwani.
Haka kuma ta samu nasararta ta farko a tarihin Gasar Kofin Duniya bayan ta doke New Zealand da ci 1-0 a matakin rukuni.
Kafin wannan karo, Masar ta taɓa halartar Gasar Kofin Duniya a shekarun 1934, 1990 da 2018, amma ba ta taɓa samun nasara ko tsallake matakin rukuni ba.
Ƙarƙashin jagorancin tauraron Liverpool, Mohamed Salah, Masar ta tsallake matakin rukuni ba tare da shan kashi ba, inda ta zo ta biyu a bayan Belgium da maki biyar bayan ta doke New Zealand sannan ta yi kunnen doki da Belgium da Iran.
Daga nan kuma ta fitar da Australia da ci 4-2 ta hanyar bugun fenariti bayan an tashi kunnen doki har bayan ƙarin lokaci, lamarin da ya ba ta damar kai wa zagayen wasannin fitar da gwani a karon farko.
Kocin tawagar, Hossam Hassan, wanda ke cikin fitattun tsoffin ‘yan wasan Masar, ya samu yabo daga sassa daban-daban saboda jagorantar ƙasar zuwa mafi kyawun matsayinta a tarihin Gasar Kofin Duniya.
Ko da yake tafiyar Masar ta ƙare a birnin Atlanta, rawar da ta taka ta nuna gagarumin ci gaba ga wata tawaga da ta shafe shekaru da dama tana fafutukar yin fice a babbar gasar ƙwallon ƙafa ta duniya.
Bayan ficewar Masar, Morocco ce kaɗai ta rage daga yankin Gabas ta Tsakiya da nahiyar Afirka a Gasar Kofin Duniya.
Tawagar Atlas Lions za ta kara da Faransa a wasan kusa da na ƙarshe ranar Alhamis bayan ta fitar da Canada a zagaye na 16 mafi ƙarfi.
AL-MONITOR