Jam’iyyar All Progressives Congress (APC) ta tabbatar a ranar Juma’a cewa Mataimakin Shugaban Kasa, Sanata Kashim Shettima, zai ci gaba da kasancewa mataimakin takarar Shugaba Bola Ahmed Tinubu a zaben shugaban kasa na 2027, lamarin da ya kawo karshen watanni ana ta rade-radin makomarsa a kan tikitin jam’iyyar.
Jam’iyyar mai mulki ta kuma bayyana kwarin gwiwar cewa Tinubu da Shettima za su sake samun nasara a zaben 2027, yayin da ta karbi takardun tsayawarsu takara domin mikawa Hukumar Zabe Mai Zaman Kanta ta Kasa (INEC) kafin wa’adin da aka sanya na ranar Asabar.
Jaridar PUNCH ta ruwaito cewa Mai Bai Wa Shugaban Kasa Shawara kan Harkokin Siyasa, Ibrahim Masari, ne ya mika takardun tsayawa takarar Tinubu da Shettima ga Shugaban APC na Kasa, Farfesa Nentawe Yilwatda, a Abuja.
Bikin ya samu halartar mambobin Kungiyar Gwamnonin APC, da ‘yan Majalisar Dokoki ta Kasa, da mambobin Majalisar Zartarwa ta Tarayya (FEC), da Kwamitin Gudanarwa na Kasa (NWC) na APC, da shugabannin jam’iyyar na jihohi, da kuma wasu ‘yan takarar gwamna.
Mika takardun na zuwa ne gabanin wa’adin karfe 6:00 na yammacin ranar Asabar da INEC ta sanya wa jam’iyyun siyasa domin loda takardun ‘yan takararsu na shugaban kasa da na Majalisar Dokoki ta Kasa ta hanyar kafar yanar gizon hukumar, kamar yadda Dokar Zabe ta 2026 ta tanada.
Da yake jawabi ga shugabannin jam’iyyar, Sakataren Tsare-tsare na APC na Kasa, Sulaiman Argungu, ya ce taron na nufin gabatar da takardun tsayawa takarar shugaban kasa da mataimakin shugaban kasa na jam’iyyar da aka cika yadda ya kamata.
Argungu ya ce Tinubu ya riga ya zama dan takarar shugaban kasa na APC bayan nasararsa a zaben fidda gwani, sannan ya bukaci mambobin jam’iyyar su ci gaba da hada kai gabanin zaben 2027.
Da yake magana a madadin gwamnonin APC, Gwamnan Jihar Imo, Hope Uzodimma, ya sake jaddada goyon bayansu ga Tinubu da shugabancin jam’iyyar.
Ya ce, “Muna farin ciki da wannan biki ya zo bayan an gudanar da zaben fidda gwani cikin tsari da gaskiya. Muna sake tabbatar da kudurinmu na ci gaba da mara wa Shugaba Tinubu da jam’iyyar baya.”
Uzodimma ya kuma bukaci mambobin APC su hada kai wajen mara wa dukkan ‘yan takarar jam’iyyar baya, yana mai bayyana kwarin gwiwar cewa APC za ta ci gaba da rike mulki bayan babban zaben kasa mai zuwa.
Yayin da yake karbar takardun tsayawa takarar, Shugaban APC na Kasa, Farfesa Nentawe Yilwatda, ya ce wannan mataki yana nuna irin amincewar da mambobin jam’iyyar suke da ita ga shugabancin Tinubu.
Ya ambaci shirin bayar da rancen karatu ga dalibai, ayyukan raya ababen more rayuwa da kuma shirye-shiryen bunkasa noma a matsayin wasu daga cikin nasarorin gwamnatin Tinubu, yana mai bayyana yakinin cewa tikitin Tinubu da Shettima zai sake samun wa’adi.
Ya ce, “Dukkanmu za mu fito mu wayar da kan jama’a tare da tattara kuri’u a dukkan shiyyoyin siyasa shida na kasar nan. Na yi imanin za a ga gasa mai kyau tsakanin gwamnoni.
“Daya daga cikin shiyyoyin siyasar kasar nan ya riga ya sanar da ni cewa zai ba Shugaban Kasa mafi yawan kuri’u. Zan yi farin cikin ganin irin wannan gasa tsakanin gwamnoni yayin da suke tattara kuri’u a jihohinsu domin a ga wace jiha ce za ta ba Shugaban Kasa mafi yawan kuri’u.”
Yilwatda ya kara da cewa jam’iyyar za ta gudanar da yakin neman zabe ne bisa la’akari da irin ayyukan da gwamnatin Tinubu ta yi, yana mai cewa ‘yan Najeriya za su saka mata da wata sabuwar damar mulki.
Da yake zantawa da manema labarai bayan taron, Sakataren Yada Labarai na APC na Kasa, Felix Morka, ya tabbatar da cewa jam’iyyar ta ci gaba da tsayar da Tinubu da Shettima a matsayin ‘yan takararta na shugaban kasa da mataimakin shugaban kasa.
Ya ce, “Dan takarar shugaban kasa na jam’iyyarmu shi ne Shugaba Bola Ahmed Tinubu, Babban Kwamandan Rundunar Sojin Najeriya, sannan dan takarar mataimakin shugaban kasa shi ne Mataimakin Shugaban Kasa na Tarayyar Najeriya, Sanata Kashim Shettima.”
Da mika takardun tsayawa takarar, APC ta tabbatar da ci gaba da amfani da tikitin Tinubu da Shettima a zaben shugaban kasa na 2027, lamarin da ya kawo karshen rade-radin da aka shafe watanni ana yi kan matsayin mataimakin shugaban kasar a tikitin jam’iyyar.