Daga JIDAUNA DARING
Uwargidan Gwamnan Jihar Filato, Barrista Helen Mutfwang, ta bayyana cewa shaye-shayen miyagun ƙwayoyi na ɗaya daga cikin manyan barazanar da ke fuskantar makomar matasa, tare da yin kira ga duk masu ruwa da tsaki su haɗa kai domin shawo kan matsalar.
Misis Mutfwang ta bayyana hakan ne a ranar Talata yayin taron masu ruwa da tsaki kan yaƙi da shaye-shayen miyagun ƙwayoyi, wanda aka shirya domin tunawa da Ranar Yaƙi da Shan Miyagun Ƙwayoyi da Safarar Su Ba Bisa Ƙa’ida ba ta Duniya, a Sabon Gidan Gwamnati da ke Little Rayfield a Jos.
Ofishin Uwargidan Gwamnan Jihar Filato ne ya shirya taron tare da haɗin gwiwar Ma’aikatar Harkokin Mata da Ci Gaban Jama’a ta jihar.
Ta ce an shirya taron ne domin wayar da kan jama’a game da haɗarin da miyagun ƙwayoyi ke haifarwa ga daidaikun mutane, iyalai da kuma al’umma baki ɗaya.
Ta ce, “Ana gudanar da wannan rana a kowace shekara a ranar 26 ga watan Yuni domin ƙarfafa matakan yaƙi da shaye-shayen miyagun ƙwayoyi da safarar su ba bisa ƙa’ida ba a faɗin duniya.”
Uwargidan gwamnan ta bayyana cewa taken bana, “Matsalar Miyagun Ƙwayoyi a Duniya: Sabbin Ƙalubale da Sabbin Hanyoyin Magance Su,” ya nuna muhimmancin tinkarar sabbin barazanar da suka haɗa da yawaitar ƙwayoyin zamani na roba, amfani da fasahar zamani wajen gudanar da laifuka da kuma sababbin dabarun safarar miyagun ƙwayoyi.
Ta jaddada cewa magance waɗannan matsaloli na buƙatar sabbin hanyoyi da suka dogara da hujjoji da kuma haɗin gwiwar gwamnati, al’umma, iyalai da sauran masu ruwa da tsaki.
A cewarta, taron ya ba mahalarta damar yin nazari kan illolin shaye-shayen miyagun ƙwayoyi da safarar su ga mutane, iyalai da al’umma, tare da sabunta alƙawarin gina al’umma mai ƙoshin lafiya, zaman lafiya da juriya.
Misis Mutfwang ta ce Gwamnatin Jihar Filato ta rungumi tsarin haɗin gwiwar sassa daban-daban wajen yaƙi da shaye-shayen miyagun ƙwayoyi da safarar su, ta hanyar aiki tare da hukumomin tarayya, sarakunan gargajiya, ƙungiyoyin fararen hula da shugabannin al’umma.
Ta bayyana cewa tsarin ya mayar da hankali ne kan ƙarfafa matakan kariya, tallafa wa masu jinya da gyaran hali, ƙarfafa matasa da kuma hana ƙungiyoyin masu aikata laifuka amfani da al’umma wajen yaɗa miyagun ƙwayoyi.
Uwargidan gwamnan ta sake tabbatar da aniyarta ta ci gaba da tallafa wa shirye-shiryen samar da ayyukan yi ga matasa, wayar da kan jama’a da kuma yaƙi da shaye-shayen miyagun ƙwayoyi a faɗin jihar.
Har ila yau, ta yaba wa jami’an tsaro, ma’aikatan lafiya, malamai, masu ba da shawara, jami’an walwalar jama’a da sauran masu ruwa da tsaki bisa ƙoƙarin da suke yi wajen hana shaye-shayen miyagun ƙwayoyi, yaƙi da safarar su da kuma taimaka wa waɗanda suka faɗa cikin wannan matsala su koma rayuwa ta gari.
Tun da farko, Kwamishinar Harkokin Mata da Ci Gaban Jama’a ta Jihar Filato, Caroline Dafur, ta yaba wa Uwargidan Gwamnan bisa irin goyon bayan da take bai wa matasan jihar.
Ta ce yaƙi da matsalar shaye-shayen miyagun ƙwayoyi na buƙatar haɗin kan kowa da kowa.
Da yake jawabi a madadin sarakunan gargajiya, Ujah Anaguta, Pozoh Johnson Magaji, ya bayyana taron a matsayin wanda ya zo a kan lokaci, la’akari da yadda matsalar shaye-shayen miyagun ƙwayoyi da safarar su ke ƙaruwa a jihar.
Ya tabbatar da cewa masarautun gargajiya za su ci gaba da mara wa wannan yaƙi baya, tare da ƙarfafa mahalarta taron su kai saƙon wayar da kai zuwa al’ummominsu.
Daga cikin waɗanda suka halarci taron akwai shugabannin addinai, ƙungiyoyin matasa da mata, jami’an tsaro, sarakunan gargajiya da ƙungiyoyin fararen hula.
Taron ya kuma ƙunshi gabatar da muƙala kan illolin shaye-shayen miyagun ƙwayoyi daga bakin ƙwararren likitan kwakwalwa na Asibitin Koyarwa na Jami’ar Jos (JUTH), Dakta Kurkat Maigida.