Daga GEORGE COBEN, Bauchi
Jami’an rundunar ‘yan sandan Jihar Bauchi sun ceto wani mutum mai shekara 25 da ake zargin ya yi damfara ta hanyar karyar kasancewa jami’in tsaro daga fusatattun mutane da suka yi yunkurin dukan sa, yayin da kuma suka kama wani da ake zargi da yunkurin fyade, shiga haramtacciyar hanya da sata.
Jami’in hulda da jama’a na rundunar, SP Nafiu Habib, ne ya bayyana hakan cikin wata sanarwa da ya fitar a ranar Asabar.
Habib ya ce an ceto wanda ake zargin na farko, Haruna Abdulazeez, ne bayan ‘yan sanda sun samu kiran gaggawa daga manajan Royal Zee Bar da ke bayan Makarantar Firamare ta Gwallameji da misalin karfe 11:30 na safe a ranar Alhamis.
Sanarwar ta ce wanda ya kira ya bayyana cewa ana dukan wanda ake zargin ne bayan ya yi ikirarin cewa shi ma’aikaci ne na Hukumar Yaki da Sha da Fataucin Miyagun Kwayoyi ta Kasa (NDLEA).
Binciken ‘yan sanda ya kuma danganta wanda ake zargin da wani korafi da wani matashi mai shekara 19 dan unguwar Gwallameji ya shigar.
Mai karar ya ce a ranar 18 ga Yulin 2026, wanda ake zargin ya gabatar da kansa a matsayin jami’in dan sanda, ya kama shi tare da kai shi wani wuri da ke kusa da hedkwatar sashen yaki da munanan laifuka (VCRU) a Bauchi.
Wanda aka yi wa lamarin ya ce an tsare shi ba bisa ka’ida ba na tsawon kusan awa uku, sannan aka kwace masa wayoyin hannu biyu, na’urar adana wutar lantarki (power bank), fitila, caja biyu na waya da kuma mukullan gida, wadanda daga bisani ‘yan sanda suka kwato a matsayin hujjojin bincike.
‘Yan sanda sun ce za su gurfanar da wanda ake zargin a gaban kotu bayan kammala bincike.
Kwamishinan ‘yan sandan jihar, Mista Sani-Omolori Aliyu, ya shawarci jama’a su kasance masu lura da mutanen da ke karyar kasancewa jami’an tsaro tare da kai rahoton duk wani abu da suke zargi zuwa ofishin ‘yan sanda mafi kusa.
A wani lamari makamancin wannan, ‘yan sanda sun kama wani matashi mai shekara 22, Ahmed Sale, mazaunin yankin Kobi da ke cikin birnin Bauchi, bisa zargin karyar kasancewa jami’in tsaro, shiga haramtacciyar hanya, yunkurin fyade da kuma sata a Kwalejin Lafiya ta Malikiyya da ke Old GRA a Bauchi.
Sanarwar ta ce ‘yan sanda sun samu rahoto daga kwalejin da misalin karfe 6:30 na safe a ranar Juma’a.
Binciken farko ya nuna cewa da misalin karfe 2:30 na dare a ranar, wanda ake zargin ya shiga dakin kwanan dalibai mata ba bisa ka’ida ba, sanye da cikakken kayan kamuflajin ‘yan sanda, yana ikirarin cewa yana aiki da Garu Security Service a Bauchi.
Nan take aka kama wanda ake zargin, inda aka kwace kayan kamuflajin ‘yan sanda da yake sanye a matsayin hujjar bincike.
Sanarwar ta kara da cewa karin bincike ya nuna cewa ana kuma zargin mutumin da hannu a wasu jerin sace-sacen da aka rika kai rahotonsu a yankin dakunan kwanan daliban.