Daga GEORGE COBEN, Bauchi
Dan takarar gwamnan Jihar Bauchi na jam’iyyar Allied Peoples Movement (APM), Dakta Yakubu Adamu, ya bai wa al’ummar Sabon Kaura da ke Yelwa a Bauchi sabon transfoma mai karfin 500 KVA.
An mika transfoman, wanda aka kiyasta kudinsa ya kai kimanin Naira miliyan 15, ga al’ummar yankin ranar Litinin.
Jagoran kungiyar WAZOBIA mai goyon bayan takarar gwamnan Dakta Yakubu Adamu da kuma takarar Sanata ta Gwamna Bala Mohammed a Bauchi ta Kudu, Muntaka Duguri, ya ce an yi wannan tallafi ne saboda dadewar da al’ummar yankin suka yi ba tare da wutar lantarki ba sakamakon lalacewar transfoma.
Duguri, wanda Alhaji Babangida Ajiya ya wakilta, ya ce tun farko al’ummar yankin sun yi zaton za a yi musu wannan taimako ne bayan zaben 2027.
Ya ce Dakta Adamu ya yanke shawarar samar musu da transfoman tun kafin zabe saboda damuwarsa da halin da suke ciki.
Ya kuma tabbatar wa mazauna yankin cewa idan aka zabe shi gwamna, zai ci gaba da tallafa wa ayyukan more rayuwa da bunkasa tattalin arziki a fadin jihar.
Hakimin Sabon Kaura-Nasarawa, Alhaji Yusuf Mai Samari, wanda ya karbi transfoman a madadin al’ummar yankin, ya nuna godiyarsa bisa wannan taimako.
Ya bayyana tallafin a matsayin misali na yadda shugabanci ke iya kawo sauyi mai amfani ga rayuwar talakawa.
Mai Samari ya bukaci mazauna yankin da su kare transfoman domin tabbatar da dorewar samar da wutar lantarki ga al’umma.
Shi ma da yake jawabi, Shugaban Matasan Kiristoci na WAZOBIA, James Usman, ya yaba wa gwamnatin Gwamna Bala Mohammed bisa samar da kayayyakin more rayuwa da suka inganta rayuwar al’ummar Sabon Kaura.
Ya ce sanya fitilun hasken rana a kan tituna ya kara habaka harkokin kasuwanci tare da inganta tsaro a yankin.
Usman ya kara da cewa da dama daga cikin mazauna yankin sun riga sun bayyana goyon bayansu ga takarar gwamnan Dakta Adamu da kuma takarar Sanata ta Gwamna Bala Mohammed.
Mazauna yankin sun yi murna da wannan tallafi tare da bayyana fatan cewa nan ba da dadewa ba za a dawo da wutar lantarki bayan shekaru na fama da duhu.
Jaridar ‘YANCIN DAN ADAM ta kuma gano cewa Dakta Adamu ya bai wa al’ummar Rafin Zurfi da ke Yelwa wani transfoma mai karfin 300 KVA domin rage matsalar rarraba wutar lantarki da suke fuskanta.