Daga ABBAS GUNGURA, Bauchi
Shugabar Kotun Daukaka Kara ta Najeriya, Mai Shari’a Monica Dongban-Mensem, ta bukaci a karfafa hadin gwiwa tsakanin bangaren shari’a da jam’iyyun siyasa domin zurfafa dimokuradiyya a fadin Afirka.
Ta bayyana hakan ne ranar Talata yayin da take gabatar da sakon fatan alheri a Taron Tattaunawar Dimokuradiyya na 2026 da tsohon Shugaban Kasa Goodluck Jonathan da Gidauniyarsa suka shirya a Bauchi.
Mai Shari’a Dongban-Mensem ta ce gayyatar da aka yi mata babban abin alfahari ne, tare da yabawa gidauniyar bisa ci gaba da samar da dandalin tattaunawar dimokuradiyya na nahiyar Afirka.
Ta ce mayar da hankali kan rawar da jam’iyyun siyasa da bangaren shari’a ke takawa wajen karfafa dimokuradiyya ya zo a kan lokaci.
Ta kara da cewa tattaunawa kan alakar da ke tsakanin cibiyoyin siyasa da kotuna ta zama wajibi musamman a wannan lokaci da ake fuskantar sauye-sauye a fannonin siyasa, fasaha da tattalin arziki.
“Karfin tsarin mulkin dimokuradiyya yana rataye ne da karfin cibiyoyi,” in ji ta.
Ta jaddada cewa dimokuradiyya na bukatar bin kundin tsarin mulki, mutunta doka da kuma tabbatar da adalci, rikon amana da warware rikice-rikice ta hanyoyin lumana.
Mai Shari’a Dongban-Mensem ta bayyana bangaren shari’a a matsayin mai fassara doka ba tare da son rai ba kuma mai kare tsarin mulki, yayin da ta ce jam’iyyun siyasa su ne hanyar shiga siyasa, wakilci da samar da shugabanni.
“Ko da yake aikinsu ya bambanta, dukkan bangarorin biyu suna da alhakin kare sahihancin dimokuradiyya da kuma tabbatar da amincewar jama’a ga gwamnati,” in ji ta.
Ta yaba wa tsohon Shugaban Kasa Jonathan bisa kafa Taron Tattaunawar Dimokuradiyya, tana mai cewa gidauniyar ta bayar da gudunmawa sosai wajen bunkasa dimokuradiyya a Afirka ta hanyar inganta mika mulki cikin lumana, sahihan zabuka da kuma cibiyoyi masu karko.
Shugabar Kotun Daukaka Kara ta bayyana yakinin cewa shawarwarin da za su fito daga taron za su taimaka wajen karfafa tsarin mulki da mutuncin cibiyoyi a Najeriya da sauran kasashen Afirka.
Taron Tattaunawar Dimokuradiyya na Gidauniyar Goodluck Jonathan na hada shugabannin Afirka, alkalai, masana ilimi da abokan hulda wajen tattauna batutuwan shugabanci, zabuka da gina cibiyoyi.