Daga SEKYEN WALSHAK
Majalisar Zartarwa ta Jihar Filato ta amince da kafa sabuwar Ma’aikatar Jin Kai da Rage Talauci domin ƙarfafa matakan gwamnatin jihar wajen tunkarar matsalolin jin kai tare da tallafa wa al’ummomin da ke cikin mawuyacin hali a faɗin jihar.
An yanke wannan hukunci ne a taron Majalisar Zartarwa ta jihar da Gwamna Caleb Mutfwang ya jagoranta a Gidan Gwamnati da ke Little Rayfield a Jos.
Da take yi wa manema labarai bayani bayan taron, Kwamishiniyar Yaɗa Labarai da Sadarwa, Joyce Ramnap, ta bayyana cewa sabuwar ma’aikatar za ta kasance cibiyar da za ta haɗa tare da daidaita ayyukan agajin jin kai, kariyar zamantakewa da shirye-shiryen rage talauci a faɗin Jihar Filato.
Ta ce ma’aikatar za ta haɗa ayyukan Hukumar Ba da Agajin Gaggawa ta Jihar Filato (SEMA) da Cibiyar Kula da Masu Rauni (Trauma Centre) domin inganta haɗin kai da kuma tabbatar da saurin ba da amsa ga buƙatun jin kai.
Ramnap ta ƙara da cewa sabon tsarin zai ƙarfafa haɗin gwiwa tsakanin gwamnatin jihar da gwamnatin tarayya wajen aiwatar da shirye-shiryen jin kai da rage talauci, tare da inganta isar da tallafi ga al’ummomi da daidaikun mutanen da ke buƙata.
Majalisar ta kuma amince da gyaran gine-ginen ofisoshin gudanarwa na Babbar Kasuwar Jos da kuma Kasuwar Satellite domin inganta yadda ake gudanar da ayyukansu da kuma ƙarfafa tsarin gudanarwar kasuwannin.
A ɓangaren tsaro da ababen more rayuwa, majalisar ta amince da saye da girka ƙarin fitilun tituna masu amfani da hasken rana da kuma na’urorin kyamarar tsaro ta CCTV a faɗin biranen Jos da Bukuru.
Ta bayyana cewa aikin zai shafi fitilun tituna guda 4,029, yayin da za a sayo tare da girka kyamarorin CCTV guda 199 a matakai biyu domin inganta sa ido, tsaro da lafiyar jama’a.
Majalisar ta kuma amince da aikin gyaran fitilun tituna da ake da su a faɗin biranen domin tabbatar da cewa suna ci gaba da aiki yadda ya kamata.
Ramnap ta ce waɗannan matakai suna nuna ƙudirin gwamnatin Mutfwang na inganta tsaron jama’a, ƙarfafa kariyar zamantakewa da kuma zuba jari a muhimman ababen more rayuwa da za su tallafa wa ayyukan tattalin arziki da inganta rayuwar mazauna jihar.
Ta ƙara da cewa gwamnatin jihar za ta ci gaba da aiwatar da manufofi da shirye-shiryen da ke inganta ci gaba mai haɗa kowa da kowa, kare marasa ƙarfi da kuma samar da yanayi mai aminci da dacewa domin bunƙasa tattalin arziki mai ɗorewa.
Mataimakin gwamnan jihar, Sakataren Gwamnatin Jihar da sauran mambobin Majalisar Zartarwa ta Jihar Filato ne suka halarci taron.