Daga DANMALE ABDULMUMIN, Abuja
Gwamnatin Tarayya ta ayyana Talata, 25 ga Agusta, a matsayin ranar hutu domin tunawa da bikin Maulidin Annabi Muhammad.
Ministan Harkokin Cikin Gida, Olubunmi Tunji-Ojo, ne ya sanar da ayyana hutun, inda ya taya Musulmi a Najeriya da sauran sassan duniya murnar zagayowar ranar.
Tunji-Ojo ya bukaci ’yan Najeriya da su yi tunani kan darussan tausayi, tawali’u da hidima ga al’umma da rayuwar Annabi Muhammad ta koyar.
Ya ce, “Kowace ranar Eid-ul-Mawlid tana ba mu damar dakatawa domin daukar darussa daga rayuwar da aka gina bisa tausayi, tawali’u da hidima ga sauran mutane.”
Ministan ya kuma yi kira ga ’yan Najeriya da su yi addu’ar samun zaman lafiya da hadin kan kasa, tare da yin bikin cikin natsuwa da mutunta juna.
Ya sake tabbatar da kudirin gwamnatin Tarayya na kare rayuka da dukiyoyin ’yan kasa, da kuma tabbatar da zaman lafiya a fadin kasar.