Daga SAMUEL MATHIAS, Minna
Kungiyar Malaman Jami’o’i ta Najeriya (ASUU), reshen Jami’ar Ibrahim Badamasi Babangida da ke Lapai, ta ayyana yajin aiki ba tare da wa’adin karewa ba, wanda ya fara aiki nan take, bisa zargin gazawar Gwamnatin Jihar Neja wajen aiwatar da muhimman sassan yarjejeniyar da Gwamnatin Tarayya ta kulla da ASUU a shekarar 2025.
An cimma matsayar yajin aikin ne a ranar Litinin, 24 ga Agusta, yayin wani taron gaggawa na kungiyar da taron manema labarai da aka gudanar a filin taron yaye dalibai na jami’ar.
Shugaban ASUU na IBBUL, Galadima Bala, ya ce matakin ya zama dole ne sakamakon dogon jinkirin aiwatar da yarjejeniyar, duk da tattaunawa da dama da kuma alkawuran da gwamnati ta yi.
Ya ce abubuwan da kungiyar ke bukata da ba a biya ba sun hada da kashi 40 cikin 100 na alawus din Earned Academic Allowance, alawus din farfesoshi, alawus din hutu, kudaden fansho da kuma bashin alawus din EAA na shekarar 2009, da sauran su.
Bala ya ce, “Mun yi hakuri tun daga watan Janairu, lokacin da ya kamata a fara aiwatar da yarjejeniyar, amma yanzu mun shiga watan Agusta, kuma basussuka suna ta taruwa.”
Kungiyar ta yi zargin cewa har yanzu Gwamnatin Jihar Neja ba ta aiwatar da yarjejeniyar da aka cimma a Abuja tsakanin manyan masu ruwa da tsaki, wakilan gwamnati da jami’o’in gwamnati daga sassa daban-daban na kasar ba.
Ta ce kusan jami’o’in jihohi 16 da ke Bauchi, Gombe, Benue, Yobe, Osun, Ekiti, Kano da Nasarawa sun fara aiwatar da yarjejeniyar.
ASUU ta yi kira ga Gwamnatin Jihar Neja, masu ruwa da tsaki da kuma al’ummar jihar masu kishin ci gaba da su shiga tsakani domin warware matsalolin, dawo da zaman lafiya a bangaren masana’antu da kuma bai wa dalibai damar komawa karatu.
Sai dai kungiyar ta ce har yanzu kofarta a bude take ga sahihiyar tattaunawa mai ma’ana da za ta samar da sakamako, tana mai cewa za a dakatar da yajin aikin da zarar gwamnati ta nuna kwakkwaran kuduri da daukar matakan zahiri na aiwatar da yarjejeniyar.
Kungiyar ta ce, “Dole ne mu dauki makomarmu a hannunmu domin ganin gwamnati ta mutunta yarjejeniyar da ta shiga da kanta.”
ASUU ta kuma nuna damuwa kan rahotannin ficewar dimbin malaman jami’a daga Jami’ar Jihar Kaduna, inda ta ce an ruwaito cewa sama da malamai 200 sun bar jami’ar.
Kungiyar ta yi gargadin cewa ba ta son irin wannan lamari ya faru a Jami’ar IBB.
Ta yi kira ga mambobinta da su kasance cikin kwanciyar hankali, hadin kai da bin doka, tare da nuna damuwa kan illar da yajin aikin zai iya haifarwa ga dalibai, iyaye da kuma al’ummar jami’ar.