Daga JOHNSON NONGO, Makurdi
Gwamnan Jihar Benue, Hyacinth Alia, ya tabbatar wa al’ummar Sankera cewa ba za a kafa wata makiyayyar shanu a jihar ba tare da amincewar al’ummar jihar ba, yayin da ya sanar da tura rundunonin sojoji uku zuwa yankin.
Gwamna Alia ya bayyana hakan ne a ranar Litinin a Katsina-Ala, yayin wani taron tattaunawa da masu ruwa da tsaki daga yankin siyasar Sankera, wanda ya kunshi kananan hukumomin Katsina-Ala, Ukum da Logo.
Da yake magana kan damuwar da aka nuna game da shirin gwamnatin tarayya na kafa makiyayyar shanu, gwamnan ya ce gwamnatinsa ba za ta amince da kafa wata makiyayyar shanu a Benue ba tare da amincewar al’umma ba.
Ya ce, “Babu wanda zai tilasta mana mu mika ko da inci daya na filinmu ga makiyaya saboda kowace irin manufa; idan hakan zai faru, ina tabbatar muku cewa ba a lokacin da nake gwamnan Jihar Benue ba.”
Gwamnan ya bayyana cewa za a jibge rundunonin sojoji uku a Agu da ke Katsina-Ala, Anyiin da ke Logo da kuma Azendeshi da ke Ukum, a matsayin wani bangare na matakan karfafa tsaro a yankin.
Ya kuma sanar da bayar da babura 30 ga hukumomin tsaro a Sankera domin inganta sintiri da kuma taimakawa wajen gaggauta kai dauki idan aka samu matsalar tsaro.
Gwamna Alia ya ce matakan tsaron na da nufin inganta tsaron rayuka da dukiyoyin jama’a tare da karfafa wa jami’an tsaro damar tunkarar kalubalen tsaro da ka iya tasowa a Sankera.
Dangane da ayyukan more rayuwa da ci gaba, gwamnan ya sanar da shirin gina wani sabon madatsar ruwa mai karfin samar da megawatt 460 na wutar lantarki, yana mai cewa aikin zai samar da ruwa tare da taimakawa wajen samar da wutar lantarki ga al’ummar jihar.
A halin yanzu Gwamna Alia na gudanar da rangadin godiya a fadin jihar domin nuna godiya ga mambobin jam’iyyar All Progressives Congress (APC) bisa zaben da suka yi masa a zaben fidda gwani na gwamnan jihar, wanda ya ba shi damar tsayawa takarar jam’iyyar a babban zaben 2027.
A wani bangare na rangadin, Gwamna Alia na gudanar da tarukan tattaunawa da masu ruwa da tsaki a sassan jihar, wadanda aka rarraba bisa mazabun tarayya 11.