Daga ABDULRAMAN IBRAHIM
Musulman da suka halarci bikin Mauludin Annabi Muhammad (SAW) a Babban Masallacin Jos, Jihar Plateau, sun bukaci ’yan Najeriya da su karfafa zaman lafiya, mutunta juna da hakurin juna tsakanin mabiya addinai.
An gudanar da bikin ne karkashin taken “Koyi da Hanyar Annabi ta Zaman Lafiya, Mutunta Juna da ’Yancin Addini”, inda aka gabatar da wa’azuzzuka kan rayuwar Annabi Muhammad (SAW), koyarwarsa da kyawawan dabi’un da ya yi wa duniya misali.
A wa’azin farko, Sheikh Mustapha Gwarando ya yi bayani kan Faidul Ahmadi, inda ya yi magana kan zuriyar Annabi da kuma rayuwar kwarai da ya yi.
Sheikh Mukhtar Adam Albahari, Shugaban Council Lajna Dariqah Muslim Council, ne ya gabatar da wa’azin na biyu, inda ya bukaci Musulmi, musamman matasa, su yi koyi da dabi’un Annabi na aiki tukuru, gaskiya, tausayi da zaman tare cikin lumana.
Sheikh Albahari ya tuna da yadda Annabi ya fara sana’ar kiwon dabbobi da kasuwanci tun yana matashi, yana mai cewa halayensa da amincinsa ne suka sa jama’a suka amince da shi.
Ya kuma bayyana irin kokarin da Annabi ya yi wajen karfafa zaman lafiya tsakanin mabambantan kungiyoyin addini, musamman a lokacin da yake Madina.
Malamin ya bukaci Musulmi su rike wadannan dabi’u, su kuma guji kiyayya, musamman yayin da kasar ke tunkarar babban zaben 2027.
Ya shawarci masu neman mukaman siyasa da su dogara ga kaddarar Allah, yana mai cewa duk wanda Allah Ya kaddara zai rike wani matsayi, babu makawa zai same shi.
Sheikh Albahari ya kuma yi kira ga al’umma da su zauna lafiya da juna, tare da mutunta juna da karfafa hakurin addini.